Cjapitul Cuint

Furbetât di Pitac.

Ven a stai che Pitac, lât cun Diu, e rivât a cjase, al cjapê sù un mus vieli, chal veva, dut scusade le schene e i flancs e al jere miec mangjat des moscjes, e montât parsore, al tornò di gnûv a le cort dal Re menânt cun se un milion di moscjes e di tavans che in sdrume e fasevin un nûl grand, che sì e no che si viodevilù, e rivavânti dal Re, al dis:

Pitac. Jo o soi a chi Re, tornât a te.

Re. No ti vevio dite jo che, se tu non tu tornâvis a me come moscje, che jo ti vâres fât tajâ vie al cjâf dal bust?

Pitac. Lis moscjes no vano lor parsore lis carognis?

Re. Sì, e vân.

Pitac. E alore jo o soi tornât parsore di une carogne scusâde e dute cjariâde di moscjes, come che tu vidis, che squasi le àn mangjade dute cun me insieme ancjemò: daspò o crôt di vêti servît chel tant che jo ti vêvi imprometût.

Re. Tu ses un grand omp. Alon va là indenânt, che jo ti perdoni, e voaltris menâilu a mangjâ.

Pitac. Nol mangje chel che ancjemò nol à finit le opare.

Re.Parcè, atu tu salacôr altri di dî?

Pitac. Jo no ài ancjemò scomencjât.

Re. Sù po!, pâre vie che carogne, e tu tiriti une vôre in bande parcè che jo o viôt vignî in ca dôs fèmines che salacor e àn voe di vê udience di me; e cuant jo les varâi mandâdis, o tornârin di gnûv a resonâ insiemit.

Pitac. Jo o vôi, ma tu viôt di dâ le sentence, juste.