Cjapitul
Decim
Laudes
dâdis dal Re a lis fèmines.
Re. Tant e àn in lôr boncûr, lis fèmines,
sintiment e prudence, tant che cualchi di chestis robis di te
imponudis atuart; e se a sorte pur une e pecjee par debilece e jè
mertevule di scuse, par jessi jè plui mole e plui facile a colâ in
chescj difiets che no un omp. Ma disimi un pôc, no si pò dî che
al sidi muart chel che si è disseparât di chest ses? Prime, le
femine e vûl ben al sô omp, parturîs sang, ju tire sù, nudrîs,
dispatuse e ur mostre dutis lis buinis creances. Le femine e tignj sù
i cjantons de cjase, mantien le robe, e viôt de famee, e poche lis
massaries e proviôt al dibisugn de famee e de cjase, e ame cun
fideltât, e jè deliciôse di triscâ, gentîl tal tabajâ, sclete
tal contratâ e discrete tal vê la mèscule in man, svelte tal
ubidî, oneste tal resonâ, modeste tal contignîsi, caste tal
mangjâ, di miege vigogne tal bevi, mansuete cun chei di cjase e
tratabile cun chei difûr. In fin dai fins, le femine dongje l'omp si
pò dî che jê e sidi une geme orientâl, leâde in aur pûr; e par
une, che colê in cuâlchi frenesie o umôr stravagant, cetantis al
contrari e son onestes e par ben; e par chist che jo o ài ritignût
che le sentence che o ài dade e sidi stade juste.
Pitac.
Si viôt propit
che tu amis tant les fèmines, e par chist tu às fat un cussì biel
ûs di peraulis in lôr laude. Ma ce disarâtu
tu se jo ti fasarai tornâ in daûr dut chel che tu as dite in lôr
favôr, prime che tu lidis a durmî doman di sere?
Re.
Cuant che tu fasaras chest, che jo o riten che al sidi mpossibil che
tu tu lu fasis, jo ti disarai che tu sês
al prin omp dal mont; ma se tu no tu lu fasarâs
jo ti fasarâi
picjâ tic e tac.
Pitac.
Sù po!, si viôdin
doman.
Cussì, jessent sere, al Re si
tirà intes sôs stansiis e Pitac, daspò vè cenât, al lâve a
durmî te stale par chê gnot, cabuland fra sé di cirî fûr le
strade par che al Re al cjantâs par ledrôs di chel che al vêve
dite in laude des fèmines; e, vênt pensât une gnove furbetât, al
cjapâ sium, spietânt al dì par podê metile in vore
Nessun commento:
Posta un commento