Cjapitul Sest

Barufe di femines.

vignîn mo duncje dôs fèmines denant al Re, e une di chês e veve robât un spieli di cristal a che altre, e le parone dal spieli si clamave Aurelie, e che altre che lu veve robât si clamave Lise, e e veve al spieli in man. E Aurelie lementânsi denant al re, e dis:

Aurelie.Tu as di savè, Signôr, che cheste usgnot passade e jè stade te mê cjamare e mi à robât chel spieli di cristal ch'e ten in man. Jo gial ài domandât plui voltes, e je mal à neât e nol à volût tornâ, e par chist jo ti domandî justizie.

Lise. Cheste no jè le veretât, anzit son gja dîs che jo lu ài comprât cui miei bêçs e no sâi cemût che cheste e vèdi il fiât di seguitâ a domandâ chel che nol è sô.

Aurelie. Deh, just Re, no stà dâ credince a lis peraulis stuartis di custìe, parcè che e jè une larie publiche che no à cusjence né fede, e tu âs di savè sô Majestât che jo no mi sares mote a domandâ chel che nol è gno par dut l'aur dal mond.

Lise. O ce cusjence gruèsse! E sa jê mo' ben dâle di intindi di jessi jê chê de reson, e cui ti crôdaressie, ah, sûr, a’n savarêsitu cirî fûr di miôrs? Ma nô o sin denant a un judis che al cognosarà l mê nocence e la tô falsetât.

Aurelie. O tiere, parcè no tu ti viergis a gloti cheste cancare che cun tante muse rote a dinee chel che al è gno, e di plui si sfuarçe di dâ a intindi di jessi jê chê de reson e jo al tuart? O Cîl, penetree tu la veretât di chest fat.